कोइराला-प्रचण्ड खँल्हाबंला
प्रधानमन्त्री पुष्पकमल दाहाल प्रचण्डं सेनापति कारवाहीया खँय् समर्थन यायेत कांग्रेस सभापति गिरिजाप्रसाद कोइरालानाप इनाप यानादीगु दु ।
सोमवाः संवैधानिक समितिया बैठकय् ब्वति कायेत इनाप यायेत न्हिनय् कोइराला निवास थ्यंकादिम्ह प्रधानमन्त्री प्रचण्डं कोइरालायात कारवाहीलय् समर्थन यायेत इनाप यानादीगु खसाः कोइरालां थ्व प्रकृयाय् साझा सहमतिइ कथं जक न्ह्याः वनेमाःगु अडान तयादिल ।
तर प्रधानमन्त्रीया प्रेस सल्हाकार ओम शर्मां धासाः प्रधानमन्त्रीं कोइरालाया स्वस्थ्य स्थिति बारे जक जानकारी कयादीगु खँ कनादिल ।
अथेहे थौं हे पुलाम्ह प्रधानमन्त्री शेरबहादुर देउवां च्यागू देय्या राजदूतनाप खँल्हाबंला यानादीगु दु । थीथी च्यागू देय्या राजदूत देय्या लिपांगु घटनाक्रया बारे जानकारी कायेत देउवा निवास बुढानिलकण्ठ थ्यंकादीगु खः ।
खँल्हाबंलाय् अमेरीका भारत जर्मन लगायत च्यागू देय्यात राजदूत दुथ्यागु खः ।
