थौं संविधानसभा घेराउ
येँ (सन्ध्या टाइम्स)/राप्रपा नेपाल व राष्ट्रिय जागरण परिषद् नेपालं संविधानसभा न्ह्यःने धर्ना च्वनेगु नापं घेराउ यायेगु ज्याझ्वः दयेकूगु दु ।
अन्तरिम संविधान अःखः निर्वाचन आयोगं नागरिकता मदुसां नं मतदाता परिचय पत्र बीगु धकाः निर्णय याःगु विरुद्ध थौं परिषदं संविधानसभा भवन न्ह्यःने धर्ना च्वनेगु ज्याझ्वः तयातःगु खः। नागरिक समाजया थीथी ख्यः नापं राजनीतिक दलया नेता व कार्यकर्तातय्सं दयेकूगु उगु परिषदं निर्वाचन आयोगया उगु निर्णय तत्काल हे खारेज यायेमाः धकाः माग यासें धर्ना च्वनेगु ज्याझ्वः दयेकूगु दु। नागरिकता मदयेकं मतदाता परिचय् पत्रय् नां दुथ्याकल धाःसा यक्व हे भारतीय नागरिकतय्सं नां दुथ्याकाः कन्हय् वना नेपाः सिक्किमीकरण जुइगु खतरा दुगुलिं आयोगया निर्णय तत्काल हे लित कायेमाः धकाः माग यासें थ्व धर्नाया ज्याझ्वः दयेकूगु खः ।
अथे हे राप्रपा नेपालं आःया संविधानसभां न्हूगु संविधान दयेके मफुगु, प्रधानमन्त्री ल्यये मफुगुलिं संविधानसभा नापं संसदया औचित्य समाप्त जूगु ठहर यानाः आः तत्काल हे संविधानसभा विघटन यानाः जनताया जनादेश कायेगु नितिं चुनाव घोषणा यायेमाःगु, हिन्दू धर्म व राजसंस्था बारे राष्ट्रिय जनमत संग्रह यानाः जक क्वःछीमाःगु माग नं यानातःगु दु। थुपिं हे माग न्ह्यःने तयाः थ्व घेराउ ज्याझ्वः यायेत्यंगु खः ।
