गणतान्त्रिक सरकारया दकलय् तःधंगु सम्मान साउदी राजकुमारयात
येँ (सन्ध्या टाइम्स)/ नेपाः संघीय गणतन्त्र घोषणा जुइधुंकाः आः तकया दुने दकलय् तःधंगु सम्मान साउदी अरबया राजकुमार अल वालिद विन तलालयात बीगु जूगु दु ।
थौं सुथय् वालुवाटारय् च्वंगु मन्त्रिपरिषद्या बैठकं राजकुमार तलालयात महाउज्ज्वल राष्ट्रद्विप मानपदवी बियाः सम्मान यायेगु निर्णय याःगु खः ।
निजी भ्रमणय् वःम्ह राजकुमारयात सरकारं सम्मान यायेगु खँ सरकारया प्रवक्ता नापं सूचना तथा संचारमन्त्री शंकर पोखरेलं कनादीगु खः। साउदी राजकुमार तलालं नेपालय् विकास निर्माणय् तःधंगु योगदान याःगुलिं वय्कःयात उकथं सम्मान यायेत्यनागु खँ नं संचारमन्त्री पोखरेलं धयादीगु दु। वय्कः वंगु शनिवाः जक नेपाः भ्रमणय् वःगु खः ।
थ्वहे दथुइ मन्त्रिपरिषदया थौंया बैठकं राहदानी नियमावली २०६७ यात संशोधन यायेत सैद्धान्तिक सहमति याःगु दु। नियमावली संशोधान जुइधुंकाः हस्तलिखित राहदानीया थासय् मेसिन रिडेबल पासपोर्ट (एमआरपी) वितरण व व्यवस्थापनय् अःपुइगु खँ धाःगु दु ।
