अमेरिकाय् मंकाः म्हपुजा
अमेरिकाय् च्वंपिं नेवाःतय्सं चायेकातःगु संस्था नेवाः अर्गनाइजेशन अफ अमेरिकाया ल्यांग्वेज सेन्टरपाखें थुगुसी नं स्वन्तिया म्हपुजा न्यायेकल। अमेरिकाय् च्वंपिं नेवाः व गैर नेवाः यानाः ११५ म्हेसिनं ब्वति काःगु उगु म्हपुजा ज्याझ्वः भाजु राजेश श्रेष्ठ व मय्जु रोहिणी श्रेष्ठया भर्जिनियास्थित उडब्रिजया छेँय् जूगु खः। म्हपुजाया लागिं ल्यांग्वेज सेन्टरया मस्त व तःधीपिनिगु पुचलं ११५ पाः मन्दः थाःगु खः ।
ज्याझ्वलय् ल्यांग्वेज सेन्टरया नायः इश्वर राजभण्डारीं म्हपुजाया बारे कनादीगु खःसा पुजारी बासव राजोपाध्यायं म्हपुजाया विधिया महत्व बारे कनादीगु खः।
ज्याझ्वलय् अमेरिकाया निंतिं नेपाःया राजदूत डा. शंकरप्रसाद शर्मा व वय्कःया जहान, न्हापांम्ह सचिव आनन्दप्रसाद शर्मा व वय्कःया जहान नापं निम्हम्ह सचिव गौरीश्वर रेग्मी व वय्कःया जहान नं उपस्थित जुयादीगु खः। ज्याझ्वःपाखें वय्कःपिं तसकं प्रभावित जुयादीगु खः।
म्हपुजा यायां हे उकिया ऐतिहासिक, धार्मिक व सांस्कृतिक महत्वया बारे नं कनेगु ज्या जूगुलिं खास यानाः मस्तय्सं नेवाः संस्कृति बारे यक्व ज्ञान हासिल यायेफुगु खँ धाःगु दु।
बहनी निघौत्या तक जूगु ज्याझ्वः लिपा लप्ते व ब्वःताय् तयाः भ्वय् नयेगु ज्या जूगु खः। उगु भ्वजं सहभागी सकसितं थःपिं नेपालय् हे च्वंच्वना थें महसुस याका बिउगु खः ।
उगु ल्यांग्वेज सेन्टरपाखें अमेरिकाय् याःगु थ्व न्याक्वःगु मंकाः म्हपुजा खः ।
