थाई जुजुपाखें कथिन चीवर दान
यलया श्री शाक्यसिंह विहारय् वंगु शनिवाः छगू विशेष कथिन चीवर दान ज्याझ्वः जुल। ज्याझ्वलय् थाइल्याण्डया जुजु भूमिबल अदुल्यादेजपाखें विहारया भिक्षु महासंघया निंतिं शाही चीवर छ्वया हःगु खःसा थाइल्याण्डया पूर्व सहायक परराष्ट्र मन्त्री सवनीत ख्वङश्रीं उगु कथिन चीवर विहारया भिक्षुपिंत लःल्हानादीगु खः।
उगु कथिन चीवर दान ज्याझ्वलय् उपस्थित जुयादीम्ह थाई राजदूत मारिस संघीयमपोसा, श्रीलंकाया राजदूत थोसपाला हेवागेपिंत मंगल बजारंनिसें बाजंया लिसें लाखे प्याखं समेत तयाः लसकुस यानाः शाक्य सिंह विहारय् तक यंकूगु खः ।
कथिन चीवर दानया ज्या क्वचायेवं विहारया महास्थवीर धर्मपाल भन्तें कथिन दानया महत्व, नेपालय् थेरवाद बौद्ध धर्मया पुनर्प्रवेश व विहारया न्हापांम्ह अधिपति मदुम्ह प्रज्ञानन्द भन्तेया योगदानया विषयस चर्चा यानाबिज्याःगु खः ।
ज्याझ्वलय् थाई जुजुपाखें छ्वयाहःगु ३००,००० भाट दां, पाहांपाखें १०,०००भाट दां, थाई परराष्ट्र मन्त्रालयपाखें १,५०,००० भाट श्री शाक्यसिंह विहारयात लःल्हाःगु खः। ज्याझ्वलय् त्रिपिटकाचार्य भिक्षु कुमार कश्यप महास्थवीर, अखिल नेपाल भिक्षु महासंघया नायः भिक्षु बोधिसेन महास्थवीर, श्रद्धेय फ्राख्रु विशाल धर्मशोभन महास्थविर, श्रद्धेय फ्राख्रु शोभन धर्मपाल महास्थविरपिनिगु नं उपस्थिति दुगु खः। अथे हे यल जिल्लाया प्रमुख जिल्ला अधिकारी रत्नराज पाण्डे, यल उपमनपाया कार्यकारी अधिकृत अर्जुनकुमार कार्की, पुलांम्ह मेयर बेखारत्न शाक्य, पुलांम्ह मन्त्री बुद्धिराज बज्राचार्य, पुलांम्ह सांसद कृष्णलाल महर्जनयालिसें आपालं उपासक-उपासिकापिनिगु उपस्थिति दुगु खः ।
