स्वंगू दल दथुइ बजेट पेश यायेगु सहमति
सरकारं प्रमुख प्रतिपक्षी दल एनेकपा (माओवादी) सहमत मजूसां व्यवस्थापिका संसदय् बजेट पेश यायेगु निर्णय याःगु इलय् प्रमुख स्वंगू दल दथुइ बजेट हयेगु बारे सहमति जूगु दु ।
गोकर्ण रिसोर्टय् सोमवाः च्वंगु प्रमुख स्वंगू दल माओवादी, कांग्रेस व एमालेया शीर्ष नेतातय् स्वंगू चरणया मुँज्यां संसदय् न्ह्यानाच्वंगु प्रधानमन्त्रीया निर्वाचन लिछ्यानाः बजेट हयेगु सहमति याःगु खः । अथेहे बजेटया बारे थप सहलह व ठोस निर्णय यायेत पुलांपिं अर्थमन्त्रीत दुथ्याःगु छगू कार्यदल नं निस्वंगु दु ।
उगु कार्यदलय् माओवादी पाखें डा. बाबुराम भट्टराई, कांग्रेस पाखें डा. रामशरण महत व एमाले पाखें भरतमोहन अधिकारी च्वनादीगु दु । उगु कार्यदलयात गुकथं व गज्याःगु बजेट हयेगु बारे सहमति यायेगु भाःला ब्यूगु दु ।
अथेहे मुँज्यां थौं यायेगु धाःगु प्रधानमन्त्रीया चुनावयात लिछ्यानाः मंसिर ३ गते यायेगु क्वःछिउगु दुसाः शीर्ष नेतातय् मुँज्या धाःसा मंसिर २ गतेया निंतिं क्वःछिउगु दु ।
सरकार गठनया बारे धाःसा थौं नं मुँज्यां छुं ठोस सहमति यायेमफुत । माओवादी व एमालें आः जुयाच्वंगु चुनावी प्रकृयायात दिकाः मेगू हे प्रणालीलय् वनेमाःगु अडान काःगु खःसा कांग्रेसं रामचन्द्र पौडेलयात निर्विरोध घोषणा यायेमाःगु अडान काःगु खः ।
थ्वस्वयां न्ह्यः येँया हात्तिवन रिसोर्ट व गोकर्ण रिसोर्टय् जूगु शीर्ष नेतातय् मुँज्याय् नं सरकार गठनया बारे कचवं ब्वलंगु खः ।
