पसः चीकेगु पाखे ध्यान वनीला थें

थौं कन्हय् थनया न्हूसतक, वसन्तपू, वंघः लगायत आपालं व्यस्तय् गाडाय् तयाः मी हइगु 'फास्ट फुड' पसलं थाय् कयाच्वंगु दु । थज्याःगु पसःत चीकेगु निंतिं छुं ई न्ह्यः प्रहरी तकं परिचालन यायेमायेक ल्वापु जूगु खः । थ्व ल्वापुं यानाः उगु लागा छझा: आन्दोलनमय थें जुल । अन्ततः मेमेगु थासं मखुसां विश्व सम्पदा क्षेत्रय् लानाच्वंगु वसन्तपू लाय्कू लागां पसः चीकेत सफल जुल । तर मेमेथाय् धाःसा निर्वाध रुपं पसः तयेगु ज्या जुयाच्वंगु दु ।

वसन्तपूया हे दशवतार क्यनेगु देगः क्वसं मरु गणेद्यः चाःहिलाः प्याफः वनेगु लँपुइ न्हूसतक वंघलय् तयातःगु थुकथंया पसलं उगु लागा जाम जुइगु जक मखसे तसकं दुर्गन्धित नं याना बिउगु दु । पसः बन्द याये धुंकाः उगु लँपु जुयाः वने जिउगु ला खः हे मखु नापं कन्हय् कुन्हु सुथ न्हापां वनेबलय् नं उतिकं हे नवः । उगु लागाय् च्वंपिंत जक गथे नमवःगु थें उगु लागाय् स्थानीय क्लबतसें छु स्वया च्वंगु । खालि ध्यबा जक म्हयेगु ज्या खःला वा सुरक्षा व लँजुवाया स्वास्थ्ययात नं ध्यानय् तयेगु ।

अथे हे उगु लागाय् जुइगु जाम व न्ह्यःने लाःथे मोटरसाइकल दिकीगुलिं यानाः छुं आकस्मिक घटना जुल धाःसा वा दमकल एम्बुलेन्स थें जाःगु सवारी हयेमाल धाःसा गज्याःगु दुःख जुइ धइगु छकः नुगः मिखा चायेकाः बिचाः यानादिसँ । मेपिंत घटना जुइबलय् तमासा स्वयेगुयात धाःसा थःत लाइबलय् नं सुनां चिउताः तइ मखु । होश यानादिसँ ।

- विमल सागर, येँ ।

More Stories Like this