अखिल क्रान्तिकारीया जंगली व्यवहार

त्रिभुवन विश्वविद्यालयया उपकुलपति व रेक्टरयात अखिल क्रान्तिकारीया विद्यार्थीतय्सं ज्वनाः ख्वालय् हाकः पाकेगु ज्या याःगुलिं उकिया विरोध यासें प्राध्यापकतय्सं पेन डाउन शुरु याःगु दु । त्रिविविया इतिहासय् आः तक गबलें मजूनि कथं याःगु घटनायात देय्या फुक्क ख्यलं भत्स्रना याःगु दुसा स्वयम् क्रान्तिकारीया मातृ संगठन माओवादी पार्टीं नं उगु ज्याय् ल्हाः दुपिं थः कार्यकर्तायात कारवाही यायेगु धकाः बचं बिउगु दु ।

अखिल क्रान्तिकारीपाखें त्रिविविया पदाधिकारीतय्त याःगु थ्व ज्यायात न्ह्याक्व कुंखिउँसां मगाः । क्रान्तिकारीतय्गु पलाः थौंकन्हय् अति अराजकतापाखे न्ह्याः वनाच्वंगु दु । उमिगु हे कारणं गुलिखे थासय् ल्वापु, हिंसा व मनू सीगु तकया घटना नं जुइधुंकूगु दु । थ्वहे ज्यादतीया झ्वलय् आः त्रिविविया पदाधिकारीतय्त उकथंया व्यवहार यायेगु ज्या जूवंगु खः । क्रान्तिकारी विद्यार्थीतय्सं क्यंगु थ्व जंगली व्यवहारपाखें उमिसं यानाच्वंगु माग पूवनीगु नं मखु । थुकिं यानाः स्थितियात झन् मेथाय्पाखे स्वकाः जुइत्यंगु ज्या नं स्यंका बी । लिसें थौं देशय् गुगु तरल राजनीति न्ह्यानाच्वंगु खः उकिं लबः कायेत स्वयाच्वंपिं तत्वतय्त लबः बीगु ज्या जक याना बी । थः भ्रातृ संगठनया थज्याःगु ज्यायात पनेगु माओवादीया दायित्व खः । क्रान्तिकारी जक मखु थौंकन्हय् वाईसीएल, मजदूर आदि निकायतय्सं यानाच्वंगु ज्यां नं ज्यादतीया हल पुलाच्वंगु दु । थ्व ज्या पार्टीया हे निर्देशन कथं जुयाच्वंगु खः वा पार्टीया हे हाथ्या बी कथं अराजक कार्यकर्तातय्सं यानाच्वंगु खः थुकी गम्भीर रुपं बिचाः जुइमाःगु दु ।

More Stories Like this