न्हय्गू दलया मुँज्या निष्कर्षविहिन

सर्वोच्च अदालतं प्रधानमन्त्रीया चुनाव प्रकृया व लिच्वःया छुं अर्थ मदु धाःसें उगु खँ पुनःविचाः यायेत संविधानसभाया सभामुख सुवास चन्द्र नेम्वाङयात उजं बिउगुलिं थौं सभामुख नेम्वाङं मू मू न्हय्गू दलया शीर्ष नेतातय्गु मुँज्या सःतादीगु खः ।

सभामुखया ज्याकू सिंहदरवारय् च्वंगु उगु मुँज्याय् दलया नेतातय्सं सर्वोच्च अदालतं बिउगु निर्णययात थःत पाय्छि कथं व्याख्या याःगुलिं उगु मुँज्या बिना निष्कर्ष क्वचाःगु खः ।

मुँज्या बिना निष्कर्ष क्वचाःसां नं कन्हय् जुइगु प्रधानमन्त्रीया झिन्हय्क्वःगु चुनाव न्ह्यः मू मू स्वंगू दलया मुँज्या च्वनाः उगु खँय् सहलह यानाः क्वःछीगु सहमति जूगु दु ।

मुँज्याय् थौं कन्हय् न्ह्यानाच्वंगु राजनीतिक अवस्था व बजेट लिसें थी थी विषयस तकं सहलह जूगु खः ।