छगू जक प्रतिवेदन पेश जुइ
येँ (सन्ध्या टाइम्स)/ एकीकृत माओवादीया गोप्य धयातःगु स्वम्ह नेताया स्वंगू ब्यागलं ब्यागलं प्रतिवेदन संचारमाध्यमय् सार्वजनिक जूगुयां कन्हय् कुन्हु थौं माओवादी उपाध्यक्ष नारायणकाजी श्रेष्ठ प्रकाशं केन्द्रीय विस्तारित बैठकय् छगू जक प्रतिवेदन पेश जुइ धयादीगु दु ।
माओवादीं थ्व सिबें न्ह्यः अध्यक्ष प्रचण्ड, उपाध्यक्षपिं मोहन बैद्य किरण व डा. बाबुराम भट्टराईपाखें ब्यागलं ब्यागलं हे प्रतिवेदन पेश याकेगु तयारी यानाच्वंगु खः। उकिया लागिं स्वंगुलिं प्रतिवेदनयात पार्टीया जिल्लास्तरया कार्यकर्तातय् दथुइ तक बहसय् यंकूगु खः। थ्व स्वंगुलिं प्रतिवेदन गोप्य जूगुलिं ब्वंके जक बीगु तर लिखित रुपय् धाःसा केन्द्रीय नेतातय्त तकं मबिसे तयातःगु खः ।
पार्टीया राज्य समितिया दुजःतय्सं तक ब्वति काइगु उगु विस्तारित बैठक जुइत्यंगु गोर्खाया पालुङटारय् च्वंगु कृष्णसेन स्मृति संचार केन्द्रय् याःगु छगू पत्रकार सम्मेलनय् न्ववासें उपाध्यक्ष प्रकाशं आः स्वम्हं नेताया प्रतिवेदनयात दुथ्याकाः मंकाः प्रतिवेदन पेश जुइगु जानकारी बियादीगु खः। वय्कलं धयादिल, 'अध्यक्षं स्वंगू हे प्रतिवेदनया संश्लेषित रुप पेश यानादी, उकी फरक मत दुसा जक मेगु प्रस्ताव पेश जुइ ।'
उपाध्यक्ष प्रकाशं संचारमाध्यमय् वःगु दस्तावेज व्यक्तिगत खः धयादिल। पार्टीया उगु विस्तारित बैठक थ्वहे मंसीर ५ गतेनिसें जुइत्यंगु दु ।
