टप टेन दुने कुमारी
नकतिनि हे सम्पन्न जूगु विश्व आदिवासी फिल्म महोत्सवय् नेपालं ब्वति काःगु 'कुमारी: द लिभिङ गडेस' नांया डकुमेन्ट्री उत्कृष्ट झिगू दुने लायेत सफल जूगु दु।
वंगु अक्टुबर २० तारिखंनिसें २४ तारिख तक जूगु उगु फिल्म महोत्सवय् नेपाःया डकुमेन्ट्री न्हय्गूगु ल्याखय् लाःगु खः ।
क्यानाडाया टोरोन्टोस्थित अलग्रीन थिएटरय् जूगु उगु महोत्सवय् विश्वया मुक्कं चय्गू फिल्म प्रदर्शन जूगु खः। प्यन्हुयंकं जूगु उगु महोत्सवय् दकलय् लिपांगु दिं कुन्हु सेलेक्सन कमिटीं नेपाःया डकुमेन्ट्रीयात न्हय्गूगु ल्याखय् लाःगु घोषणा यासें विश्वया सकसिनं थ्व छगू स्वये हे माःगु डकुमेन्ट्री धकाः ल्यःगु खः ।
नेपाःया उगु डकुमेन्ट्रीया निर्देशक पृनाराज जोशीं विश्वया फिल्मत मध्ये कुमारीयात उत्कृष्ट झिगू दुने नं न्हय्गूगु थासय् दुथ्याकूगु नेपाःया निंतिं तःधंगु सफलता खः धयादीगु दु। 'सन्ध्या टाइम्स'लिसे खँ ल्हासें वय्कलं थःगु डकुमेन्ट्रीयात बिउगु स्थानपाखें थः तसकं उत्साहित जुयागु खँ कनादिल ।
