सिकागोय् न्हापांखुसी न्हूदँया ज्याझ्वः
येँ (सन्ध्या टाइम्स)/"सिकागो नेवाः" या ग्वसालय् अमेरिकाया सिकागो स्थित सेन्ट अगस्टाइन कलेजया हलय् वंगु शनिवाः न्हापां खुसी नेपाल संवत्या न्हूदँ हने ज्या जुल। सगं, सांस्कृतिक ब्वज्या, नेवाः फेसन शो, समय्बजि व नेवाः संकिपा क्यँसें बाखं च्वमि केशरमान ताम्राकारं उगु ज्याझ्वः न्ह्याकादीगु खः। भाजु मदनमोहन श्रेष्ठं उलेज्या यानादीगु उगु ज्याझ्वः डा. मनोरञ्जन धौभडेलया अध्यक्षताय् जूगु खः ।
ज्याझ्वलय् ब्वति काःपिं अप्वः धइथें सहभगीत नेवाः वसः पुनाः वःगु खः। सत्या मनूतय्सं ब्वति काःगु उगु ज्याझ्वलय् सकसिनं थःगु भाषा, कला, जाति, संस्कृति व नेपाल संवत् बारे न्हूगु पुस्तायात स्यने माःगु खँ वाःचायेकूगु खः ।
ज्याझ्वलय् अलिसा श्रेष्ठ, श्रस्ता तोयो ताम्राकार, सुक्रिन्स श्रेष्ठ, सुनिता अमात्य, सुदिन अमात्य व सरिता धौभडेलपिंसं नेवाः म्येय् प्याखं हुलादीगु खःसा दिनेश श्रेष्ठ व इशा श्रेष्ठं नेवाः म्येँ हालादीगु व श्याम श्रेष्ठं बाँसुरी पुयादीगु खः। नूतनराज श्रेष्ठ व विधानरत्न तुलाधरं नेपाल संवत् बारे नुगःखँ प्वंकादिल ।
ज्याझ्वलय् सत्यमोहन जोशी, पद्मरत्न तुलाधर, दुर्गालाल श्रेष्ठ, टड लुविस, शशिकला मानन्धरयालिसें वर्ल्ड नेवाः अर्गनाइजेशन व नेवाः अर्गनाइजेशन अफ अमेरिकापाखें छ्वयाहःगु भिंतुनापौ ब्वनाः न्यंकूगु खः। डा. जुनु कमल तुलाधरं सकसितं सुभाय् द्यछानादिल ।
