विहारय् न्हूदँया ज्याझ्वः
ख्वप (सन्ध्या टाइम्स)/न्हूदँ ११३१ क्यंगु लसताय् वंगु बिहिवाः ख्वपया मुनिबिहार इनाचोया ग्वसालय् स्वर्ण बालगृह परियोजनाया अपाङ्ग मस्तय्तलिसे भिंतुना कालबिल यायेगुया लिसें चियापान ज्याझ्वः जुल। भिक्षु तिस्सपाखें शील ज्याझ्वः मुनि विहार दायकया नायः रामकृष्ण वैद्यया प्रमुख आतिथ्यताय् जूगु खः ।
ज्याझ्वलय् स्वर्ण बालगृह व सुवर्ण फाउण्डेसनया नायः भाजु कृष्ण खाइतुं आर्थिक अवस्था कमजोर जूपिं अपाङ्ग मस्तय्त शिक्षा, स्वास्थ्य ज्ञानया नापं आत्मनिर्भर यायेमाःगु खँ कनादिल। अथे हे हल्याण्डया बालगृहया नकिं मय्जु जोइस भायन रायनं अपाङ्ग मस्तय्त हेला व अपमान मखु बरु उमित मायाया मिखां स्वयेमाः धासें वय्कलं पंचशीलया अर्थ नं कनादीगु खः ।
विहार दायकया नायः वैद्यं नं नुगः खँ प्वंकादीगु ज्याझ्वलय् श्रद्धेय मीरा गुरुमां नं लसकुस न्वचु बियाबिज्याःगु खः ।
