कांग्रेसपाखें हानं सर्वदलीय बैठक
सेनापति विवादयात कयाः सहलह यायेगु निंतिं थौं नं नेपाली कांग्रेसं माआवादी बाहेकया सर्वदलीय बैठक सःतूगु दु । नेपाली कांग्रेसया पार्टी ज्याकुथी उगु बैठक सःतूगु खः । थौंया बैठकय् प्रधानसेनापति चीकेगु निंतिं सरकारं कयाच्वंगु अडान व उकिया निंतिं सहमतिया लँपु छु जुइ धइगु बारे सहलह जुइगु खँ धाःगु दु । लिसें यदि सरकार सहमतिइ मवल धाःसा गुकथं न्ह्याः वनेगु धइगु बारे नं सहलह जुइगु खँ धाःगु दु ।
थौं च्वनीगु सर्वदलीय बैठकय् प्रधान न्यायाधीश नियुक्तयात कयाः नं सहलह जुइगु खँ नेपाली कांग्रेसं धाःगु दु । माओवादी सरकारं सेनाय् थें न्यायपालिकाय् नं हस्तक्षेप याये फइगु अवस्था ब्वलंगुलिं थुकिया बारे नं सहलह यायेत्यंगु खः ।
उखे थ्वहे बिषयय् सहलह यायेगु निंतिं थौं एमालें नं सर्वदलीय बैठक सःतूगु खँ सीदुगु दु । तर एमालें बैठक गन तःगु खः धइगु खँ धाःसा सी मदुनि ।
