सहमति यानाः जक कारवाही क्वचायेके माःगु निष्कर्ष
प्रधानसेनापति रुक्मांग कटवालयात सरकारं स्पष्टीकरण नापं कारवाही प्रकृया न्ह्याकूगु धासें प्रमुख प्रतिपक्षी दल नेपाली कांग्रेसं आव्हान याःगु सर्वदलीय बैठकं सहमतिया विकल्प मदुगु निष्कर्ष पीकाःगु दु ।
सोमवाः कांग्रेस ज्याकू सानेपाय् च्वंगु सर्वदलीय बैठकय् सहमति यानाः जकः निर्णय यायेत सरकारयात सुझाव ब्यूगु दु । सहमति बिना थ्व खँय् निर्णय यासाः थुकीं थप संकट जुइफुगु निष्कर्ष याःगु खँ कांग्रेस प्रवक्ता अर्जुननरिसंह केसीं धयादिल ।
सत्तारुढ माओवादी, फोरम व सदभावना बाहेक दलत दुथ्याःगु उगु बैठकय् कांग्रेसं माओवादी नेतृत्वया सरकारं सेनाय् जक मखसें प्रजातन्त्रय् हे आक्रमण शुरु याःगुलिं कारवाही दिकेत प्रस्ताव याःगु खः । मेगु दलतय्सं थुकी सहमति प्वंकूसां नं सहमति यानाः जक थ्व खँ क्वचायेकेत सरकारयात सुझाव ब्यूगु दु । बैठकय् एमाले महासचिव ईश्वर पोखरेलं एमाले स्थायी कमिटि बैठकं याःगु निर्णयया बारे बैठकय् जानकारी बियादीगु खः ।
कांग्रेसं धासाः स्पष्टिकरण प्रकृया मदिकूतल्ले सदन चलेयाके मबीगु खँ धाःगु दु । नापं सहमति बिना कारवाही यासाः कांग्रेस सतक संघर्षय् वनीगु खँ कांग्रेस प्रवक्ता केसी धयादिल ।
