सहमतिपाखें हे बजेट हयेगु : मन्त्री डा. रिजाल
संस्कृति मन्त्री डा. मिनेन्द्र रिजालं सरकारं सहमतिपाखें हे बजेट हयेगु खँ धयादिल ।
रुपन्देही थौं ग्वसाः ग्वःगु छगू ज्याझ्वलय् न्ववानादिसें मन्त्री रिजालं माओवादीं बजेट हयेगु लागि पंगः थनाच्वंसां सरकारं बजेत हयातुं त्वःतेगु दाबी यानादिल । सरकारं लिपांगु ई तक नं कुतः यानाच्वनेगु खँ धयादीगु दु ।
थौं कन्हय् दयाच्वंगु पंगः मदयेका छ्वयेगु लागि नेपाली कांग्रेसं तसकं क्वमिलु जुयाः कुतः यानाच्वंगु खँ न्ह्यथनादिसें मन्त्री रिजालं माओवादीयात सहमती वयाः दयाच्वंगु पंगः मदयेकेगु लागि कुतः यायेत नं इनाप यानादिल । शान्ति प्रकृया निष्कर्षय् मथ्यंतलय् माओवादीया सरकार दयेके मफइगु खँ धयादिसें मन्त्री रिजालं माओवादीया कारणं हे शान्ति प्रकृया निष्कर्षय् थ्यने मफूगु नं दाबी यानादिल ।
थ्वहे झ्वलय् नेपाली कांग्रेसया नेता अर्जुन नरिसंह के.सीं. प्रतिपक्षी दलया सहमति मदुसां बजेट हयेफइगु खँ धयादीगु दु ।
प्रेस युनियन कास्कीं थौं पोखराय् ग्वसाः ग्वःगु पत्रकारत नापलायेगु ज्याझ्वलय् न्ववानादिसें नेता के.सीं. एकिकृत नेकपा माओवादीं देशयात असफलतापाखे यंकेत स्वयाच्वंगुलिं बजेट हयेके मबियाच्वंगु खँ धयादिल । वय्कलं शान्ति प्रकृया निष्कर्षय् मथ्यंतलय् नेपाली कांग्रेसं सरकारया दाबी मत्वःतीगु खँ धयादिसें नेता के.सीं. बजेट हयेत माओवादीं पंगः थंसाः थःपिन्सं उकिया प्रतिकार यायेगु नं धयादिल।
