तालिम बिउगु विषयस सरकारं छानबिन यायेगु : मन्त्री कोइराला
उप-प्रधान नापं परराष्ट्रमन्त्री सुजाता कोइरालां माओवादी जनमुक्ति सेनाया क्याम्पय् भारतीय माओवादी लडाकुतय्त तालिम बिउगु धइगु विषयस सरकारं छानबिन यायेगु खँ धयादीगु दु ।
मन्त्री कोइरालां स्वतन्त्र कथं छानबिन यायेधुंकाः तालिम बिउगु खँ प्रमाणित जूसा कारवाही यायेगु खँ धयादीगु दु । भारतीय संचार माध्यम व नेपालय् च्वंगु भारतीय दुतावासं तकं नेपाःया थी थी थासय् माओवादी लडाकुया शिविरय् भारतीय माओवादी लडाकुतय्त तालिम बियाच्वंगु बुखँ पिहां वयेधुंकाः परराष्ट्रमन्त्री कोइरालां उगु खँ धयादीगु खः ।
उखे माओवादीया सैन्य इन्चार्ज वर्षामान पुन अनन्तं धाःसा अजाःगु छुं नं तालिम मबिउगु दाबी यानादिसें तालिम बिउगु खँ प्रमाणित यायेत हाथ्या बियादीगु दु । थौं येँय् रिपोर्टस क्लव नेपालं याःगु साक्षात्कार ज्याझ्वलय् उकथं हाथ्या बियादिसें प्रमाणित जूसा कारवाहीया लागि तयार जूगु खँ नं धयादिल । थ्वहे झ्वलय् इन्चार्ज पुनं भारतं शान्ति प्रकृया भंग यानाः संविधान दयेके मबीत षडयन्त्र यानाच्वंगुलीं थजाःगु आधारहीन द्वपं बिउगु नं धयादीगु दु ।
