माओवादीं भारतीय द्वपंया हानं खण्डन यात
नेपाःया माओवादीं भारतीय माओवादीयात तालिम ब्यूगु द्वपंयात माओवादीं हानं खण्डन याःगु दु । थ्वस्वयां न्ह्यः म्हिग: जक माओवादी न्वकू डा. बाबुराम भट्टराईं भारतीय पत्रिकानाप खँल्हाबल्हा यानादिसें भारतीया माओवादीयात सैन्य तालिम बियाः भारतनापया स्वापू मस्यंकीगु धयादीगु खः ।
थ्वहे झ्वलय् थौं रिपोटर्स क्लबं याःगु साक्षात्कार ज्याझ्वलय् माओवादी सैन्य इन्चार्ज वर्षमान पुन 'अनन्तं' प्रधानमन्त्रीको निर्देशनय् नेपाली सेनाया पुर्वी पृतनां प्रतिवेदन तयार यानाः दिल्ली छ्वःगु व वहे प्रतिवेदनया आधारय् भारतीय राजदूत राकेश सुदं गृहमन्त्री भीम रावलयात पौ लःल्हाःगु धयादिल ।
वय्कलं शान्ति प्रक्रिया व संविधान निर्माण प्रक्रियापाखें माओवादीयात बिस्कं तयाः सशस्त्र हस्तक्षेप यायेत भारतं पौ छ्वःगु दावी नं वय्कलं यानादिल ।
ज्याझ्वलय् एमाले नेता प्रदीप ज्ञवालिं सरकारया निर्देशनय् प्रतिवेदन मदयेकूगु धयादिल । वय्कलं थुकीया बारे छानबिन जुइमाःगु माग नं यानादिल ।
उखे थुकीया यथार्थ पिने हयेत थीथी दलया नेतातय्सं सरकारनाप माग याःगु दु । नेपाली कांग्रेसया नेता गोपालमान श्रेष्ठ, राप्रपा नायः पशुपति शम्सेर राणा लगायतं थुकीया बारे सरकारया धारणा सार्वजनिक यायेत माग याःगु खः ।
