अध्यक्षमण्डल बारे कांग्रेस-एमाले सहलह
स्वंगू दलया शीर्ष नेतात दथुइ वार्ता जुइ न्ह्यः माओवादीं प्रस्ताव याःगु अध्यक्षमण्डलया बारे नेपाली कांग्रेस व नेकपा एमालेया नेतात दथुइ खँल्हाबल्हा जूगु दु ।
प्रधानमन्त्री निवास बालुवाटरय् जूगु उगु खँल्हाबल्हाय् निगुलिं पक्षं अध्यक्षमण्डलया बारे सहमति यायेमफइगु बिचाः प्वंकूगु खः । उगु इलय् नेपाली कांग्रेस संसदीय दलया नेता रामचन्द्र पौडेल, गोपालमान श्रेष्ठ लगायतया नेतातय् ब्वति दुगु खःसा नेकपा एमालेपाखें प्रधानमन्त्री माधवकुमार नेपाल व नेता केपी ओलीया जक ब्वति दुगु खः । एमाले नायः धाःसा अध्यक्षमण्डल गठन यायेमाःगु पक्षय् दुगुलिं उगु खँल्हाबल्हाय् ब्वति मकाःगु सीदुगु दु ।
खँल्हाबल्हा लिपा कांग्रेस नेता गोपालमान श्रेष्ठं एमालें नं माओवादी प्रस्तावय् असहमति प्वंकूगु बारे एमाले नेतातय्सं जानकारी ब्यूगु धयादिल ।
