न्यायापालिका व न्यायकर्मीया सुरक्षा माग
नेपाल बार एसोसिएसनं न्यायपालिका व न्यायकर्मीतय् सुरक्षा माग यासें येँय् प्रदर्शन याःगु दु । कानुन व्यवसायीतय्सं न्यायपालिकालय् हस्तक्षेप दिकेत सरकार नाप माग याःगु दु ।
बार अध्यक्ष विश्वकान्त मैनालीं न्यायपालिकाया स्वतन्त्रतायात बचे यानांतय् माःगु खँय् बः बियादीसें अदालतय् बिचारधीन मुद्दायात राजनीतिकरण यायेगु कुतः कानुनी शासनया मूल्य मान्यता विपरित जूगु खँ धयादिल । वयेकलं अदालतय् अप्वयाच्वंगु हस्तक्षेप दिकेत व ब्यवसायीक सुरक्षाया सुनिश्चितता यायेत सरकारनाप माग यानादिल ।
बारया पुलांम्ह अध्यक्ष शम्भु थापां न्यायपालिकाया स्वतन्त्रताया निंतिं थःपिंसं न्ह्यवलें ल्वानातुं च्वनीगु धयादिल । वयेकलं 'परिवर्तनकारी न्यायाधीश' मालाः न्यायालयलय् हस्तक्षेप यायेत स्वःगु धासें परिवर्तनकारीया परिभाषा स्पष्ट यायेत माग यानादिल ।
थ्वस्वयां न्ह्यः भद्रकालीं न्ह्याःगु प्रभातफेरी रत्नपार्क, बागबजाः, पुतलीसतक जुया बार एसोसिएसनया परिसरय् थ्यंकाः सभा जूगु खः । प्रभातफेरी माओवादी निकट कानुन व्यवसायीतय् धासाः ब्वति मकाः ।
