खनाल दुईपक्षिय खँल्हाबंलाय् व्यस्त
प्रधानसेनापतिया कारवाही यायेगु वा मायायेगु धइगु विषययात कयाः एमाले अध्यक्ष झलनाथ खनालं थीथी दलया नेतात नाप दुइपक्षिय खँल्हाबंला यानादीगु दु ।
सोमवाः सुथय् प्रधानमन्त्री पुष्पकमल दाहाल प्रचण्ड नाप प्रधानमन्त्री निवास बालुवाटारय् वना खँल्हाबंला यानादीगु खः । खँल्हाबंलाय् प्रधानमन्त्री प्रचण्डं थः प्रधानसेनापति रुक्मांग कटवालयात कारवाही यायेत प्रतिबद्ध दुगु खँ धाःगु खसाः लिसःलय् एमाले अध्यक्ष खनालं कांग्रेस लगायत दलतनाप सहलह यानाः जक कारवाही न्ह्याकेत इनाप यानादीगु खः ।
अथेहे खँल्हाबंलाया झ्वलय् एमाले अध्यक्ष खनालं सेनाया निगूगु वरियताया कुलबहादुर खड्का विवादय् लाःगु धासें स्वंगूगु वरियताया छत्रमान गुरुङयात न्हूम्ह प्रधानसेनापति देयेकेत प्रस्ताव तयादीगु खसाः उकी बिचाः यायेफइगु लिसः प्रधानमन्त्री दाहालं बियादीगु खः ।
प्रधानमन्त्रीनापया खँल्हाबंलालिपा कांग्रेस सभापति गिरिजाप्रसाद कोइराला नाप सहलह यायेत नेता खनाल कोइराला निवास महाराजगंज थ्यंकादीगु खः । निम्ह नेतात दथुइया खँल्हाबंलाया झ्वलय् कांग्रेस सभापति कोइरालां माओवादीं सेनापतियात कारवाही यायेगु त्व:चीना देय् कब्जा यायेत स्वःगु धासें माओवादीया थ्व पलाःयात समर्थन मयायेत इनाप यानादिल । अथेहे एमाले अध्यक्ष खनालं कारवाही यायेगु ज्या सहमति कथं जुइमाःगु खँ न्ह्यथंनादिल ।
थौं हे सत्तारुढ नेकपा एमालेया पलहय् व प्रमुख प्रतिपक्षि दल नेपाली कांग्रेया पहलय् सेनापतियात कारवाही यायेगु खँय् सहलह यायेत निगू सर्वदलीय बैठक सःतूगु दु ।
