अध्यक्षमण्डल बारे अध्ययन जुयाच्वंगु दु : प्रम
प्रधानमन्त्री माधवकुमार नेपालं स्वंगू दलया गोप्य वार्ताय् अध्यक्षमण्डल गठन यायेगु बारे खँ वःगु धासें उकीया बारे आः अध्ययन जुयाच्वंगु खँ धयादीगु दु ।
मोहनी, स्वन्ति, छठ व नेपाल संवत् ११३१ न्हूदँ क्यंगु लसताय् प्रधानमन्त्री निवास बालुवाटारय् थःम्ह हे ग्वसाःग्वःगु तुच्चा ज्याझ्वलय् प्रधानमन्त्री नेपालं दलत दथुइ सहमतिया थीथी विकल्पया बारे सहलह जुयाच्वंगु धयादिसें अज्याःगु सहमतिया विकल्प मध्ये छगू अध्यक्षमण्डल गठन यानाः पालंपा प्रधानमन्त्री जुइगु धयादिल ।
उगु तुच्चाय् माओवादी न्वकू डा. बाबुराम भट्टराईं न्हूगु सरकार गठन जुइवं बजेट वइगु जूगुलिं दकलय् न्हापां न्हूगु सरकार गठन यायेमाःगु धयादिल ।
तुच्चाय् सभामुख सुभाषचन्द्र नेम्वाङ, मन्त्रीत, एमालेया कार्यकर्ता, नेपाल संवत् आन्दोलनया कार्यकर्ता लगायत आपलं मनूतय् ब्वति दुगु खः ।
