भारतीय द्वपं आधारहीन : भट्टराई

एनेकपा (माओवादी)या न्वकू डा. बाबुराम भट्टराईं नेपाली माओवादीं भारतीय माओवादीयात सैन्य तालिम ब्यूगु धइगु भारतीय द्वपं आधारहीन जूगु धयादीगु दु ।

भारतीय पत्रिका हिन्दूस्तान टाइम्सनाप मंगलवाः खँल्हाबंला यानादिसें भट्टराईं थःपिंसं जनयुद्धया इलय् हे भारतीय माओवादीयात तालिम मबियागु खँ न्ह्यथंसें आः झन राजनीतिक मूलधारय् वयेधुंकाः अज्याःगु तालिम बीगु ज्या यायेगु सम्भावना मदुगु धयादिल ।

वय्कलं भारतीय माओवादीयात गवलें नं तालिम मबीयागु खँ धयादिसें थंज्याःगु ज्या यानाः भारतनापया स्वापू स्यंकेगु मूर्खता मयायेगु नं धयादिल ।

वंगु कात्तिक ८ गते भारतीय राजदूत राकेश सुदं भारतीय माओवादीयात नेपाली माओवादीं भारतया छत्तिसगढ, विहार, झारखण्ड लगायत थासय् प्रशिक्षण ब्यूगु खँ न्ह्यथंसें गृहमन्त्री भीम रावलयात पौ ब्यूगु खः ।