थौं नं सदन अवरुद्ध
नेपाली कांग्रेस व तराई मधेश लोकतान्त्रि पार्टीया सभासदतय्सं रोष्ट्रम घेराउ यासें नाराबाजी यायेवं आइतवाः नं व्यवस्थापिका संसदया बैठक अवरुद्ध जूगु दु ।
प्रधानसेनापति स्पष्टिकरण प्रकरण स्थगन मजूतल्ले संसद चाले जुइ मबीगु कांग्रेस लगायत दलतय्सं अडान तयावइच्वंगु दु । अवरोधलिपा सभामुख सुवाष नेम्वाङं सोमवाः स्वताः ई तकया निंतिं बैठक स्थगित याःगु दु ।
थ्वस्वयां न्ह्यः बैठक न्ह्यायेवं माओवादी सभासद दिनानाथ शर्मां प्रधानसेनापतियात कारवाही यायेगु निर्णयपाखें थःगु पार्टी ल्यूने मवनीगु खँ धयादिल । सेनापतिया कारवाही राष्ट्रिय स्वाभिमान व सार्वभौमिकताया सवाल जूगु दाबी यासें वयेकलं विदेशीतय् इशाराय् निर्णय लित जुइलाः धकाः आशा मयायेत दलतय्त इनाप यानादिल ।
माओवादी प्रवक्ता नापं जुयादिम्ह शर्मां राष्ट्रपतियात ल्ह्वनाः सेनाया समर्थनय् लोकतन्त्र सिधेकेगु कुतः जुयाच्वंगु द्वपं बियादिल । देशय् बंलादेशया शैली कु यायेगु स्वःगु दाबी यासें सेनायात ब्वलय् क्वमबुइत कांग्रेसयात इनाप यानादिल ।
कांग्रेस सभासद रामशरण महतं नागरिक सर्वोच्चताया नामय् सेनापतियात कारवाही याना देय्यात माओवादीकरण यायेत स्वःगु धासें झिंन्ह्यगू दलया सुझावया आधारय् निर्णय लितः कायेत माओवादीयात ध्यानाकर्षण यानादिल ।
एमाले सभासद शंकर पोखरेलं नागरिक सर्वोच्चताया अर्थ व्यक्तिगत स्वेच्छाचारिता मखु धयादिल । थःगु पार्टीं अझ नं सहमतिइ बः बियाच्वंगु धासें एकतर्फी ढंगं न्ह्या मवनेत इनाप यानादिल ।
