कात्तिक २२ गते किजापुजा कुन्हु सार्वजनिक बिदा
नेवाःतय्सं कात्तिक २२ गते किजापुजा याइगु जुइवं सरकारं कात्तिक २२ गते सार्वजनिक बिदाया घोषणा याःगु दु । गृह मन्त्रालयया सहायक प्रवक्ता एकमणि नेपालं थौं छगू प्रेस विज्ञप्ति पिथना स्वन्तिया लसताय् कात्तिक २२ गते थप छन्हु सार्वजनिक बिदा बीगु निर्णय याःगु खँ न्ह्यथनातःगु दु ।
थ्वस्वयां न्ह्यः मंगलवाः नेवाःतय् थीथी खल पुचःया प्रतिनिधि नापं नेवाः सभासद्तय् छगू प्रतिनिधिमण्डल प्रधानमन्त्री थाय् वनाः कात्तिक २२ गते सार्वजनिक बिदा बीत माग याःगु खः । उगु इलय् प्रधानमन्त्री माधवकुमार नेपालं २२ गते बिदा बीगु प्रतिवद्धता प्वंकादीगु खः ।
थ्वहे झ्वलय् नेवाः देय् दबू लगायत स्वनिगः दुने न्हूदँ हनेत निस्वंगु न्हूदँ हना खलः पुचःया प्रतिनिधितय्सं कात्तिक २० गते लक्ष्मीपुजा, २१ गते म्हपुजा व २२ गते किजापुया यायेत सकल नेवाःतय्त इनाप याःगु दु ।
