'राष्ट्रपतियात लःल्हायेगु अधिकार मदु'
येँ (सन्ध्या टाइम्स)/ प्रधानमन्त्री माधवकुमार नेपालं न्ह्याथे याःसां मजिल धाःसा थम्हं राष्ट्रपतियात अधिकार लःल्हाना वनेगु धकाः न्ववानादीगु खँयात कयाः सरकारया सिँचाई मन्त्री बालकृष्ण खाँडं आपत्ति प्वंकादीगु दु ।
प्रधानमन्त्री नेपालं म्हिगः स्वंगू दलया शीर्ष नेतातय्गु मुँज्याय् अधिकार राष्ट्रपतियात लःल्हाना वनेगु धकाः ख्याच्वः बियादीगु खँ संचारमाध्यमय् वयेवं मन्त्री खाँडं उगु आपत्ति प्वंकादीगु खः ।
नेपाल प्रेस युनियनं थौं सुथय् चितवनय् याःगु पत्रकार सम्मेलनय् न्ववायेगु झ्वलय् वय्कलं थ्व आपत्ति प्वंकादीगु खः ।
राष्ट्रपतियात अधिकार लःल्हाना वनेगु प्रधानमन्त्रीयाके संवैधानिक अधिकार मदु धकाः दावी यानादिसें मन्त्री खाँडं राष्ट्रिय दायित्वपाखें सुं नं लिचिला वनेगु पायछि जुइ मखु धकाः न्ह्यथसें प्रधानमन्त्रीया धापू आक्रोशया उपज खः धकाः टिप्पणी यानादिल। आःया अवस्थाय् राष्ट्रिय सहमतिया विकल्प मदु धयादिसें वय्कलं निकासया निंतिं गम्भीर जुयाः न्ह्याः वनेत शीर्ष नेतातय् इनाप नं यानादिल ।
मन्त्री खाँडं थःगु पार्टीया नेता रामचन्द्र पौडेलया उम्मेदवारीया सवालय् नेपाली कांग्रसय् दुने विवाद मदु धकाः नं दावी यानादिल ।
