शान्तिया लागिं नं गुणस्तरीय शिक्षा माः
येँ (सन्ध्या टाइम्स)/नेपाः झायाच्वंम्ह विश्वविख्यात शिक्षाविद् जगदिश गान्धीयात मू पाहां दयेकाः कन्सर्न नेपालपाखें म्हिगः शिक्षाया विषयय् छगू विशेष ज्याझ्वः यात। थनया रुसी सांस्कृतिक केन्द्रय् कन्सर्न नेपालया निर्देशक विजय सैंजुया सभापतित्वय् 'शान्ति, न्याय व गुणस्तरीय शिक्षा' धइगु विषयय् उगु गोष्ठी जूगु खः ।
ज्याझ्वलय् मूपाहाकथं झाःम्ह शिक्षाविद् व भारतया लखनउस्थित सिटी मन्टेश्वरी स्कूलया अध्यक्ष डा. जगदीश गान्धीं शान्ति व न्याय थौंया माग जुयाच्वंगुलिं थुकिया निंतिं गुणस्तरीय शिक्षा अपरिहार्य जुयाच्वंगु खँ कनादिल। वय्कलं मस्तय्त मायां ब्वलंकेमाःगु व थौंया इलय् मानवीय शिक्षा, धार्मिक शिक्षा व राजनैतिक शिक्षा स्वंगुलिं उलि हे आवश्यक जुयाच्वंगु खँ नं कनादिल ।
ज्याझ्वलय् नेपाः पार्टीया नायः केशवमान शाक्य, सभासद् बुद्ध साय्मि डा. शिशिर श्रीवास्तव, डा. भगवानरत्न तुलाधर, डा. कमलदास मानन्धरपिंसं नं थःथःगु नुगःखँ प्वंकादीगु खः। ज्याझ्वलय् ब्वति काःपिं स्रोतातय्सं नं शिक्षाया बारे न्ह्यसः न्यनादीगु खःसा वय्कःपिनिगु न्ह्यसःया लिसः मूपाहां भाजु गान्धीं बियादीगु खः।
ज्याझ्वलय् कन्सर्न नेपालया कार्यक्रम ब्यवस्थापक जियम श्रेष्ठं लसकुस यानादीगु खः ।
मूपाहां भाजु जगदिश गान्धीया सिटी मन्टेश्वरी स्कूलय् करिब ४०,००० विद्यार्थी आखः ब्वनाच्वंगु दु। उगु स्कूल विश्वय् हे दकलय् अप्वः विद्यार्थी दुगु स्कूलया रुपय् गिनिज बुकय् नं नां दर्ता जुयाच्वंगु दु। उगु स्कूलं मेमेगु नं गतिविधिइ कीर्तिमानत तयातःगु दु ।
