कार्यदलया म्याद मंसिर २५तकया निंतिं थप

संविधानसभाय् खनेदुगु विवादित मुद्दात ज्यंकेत निस्वंगु उच्चस्तरीय कार्यदलया म्याद थौं निक्वःगु खुसी थप याःगु दु । संविधानसभाय् दुथ्याःगु २७दलया थौं च्वंगु मुँज्यां कार्यदलया म्याद मंसिर २५ गते तकया निंतिं थप याःगु खः । थ्वस्वयां न्ह्यः कात्तिक ७ गते न्हापांगु खुसी कार्यदलया म्याद थप याःगु खः ।

२७ दलया मुँज्याय् कार्यदलया संयोजक पुष्पकमल दाहाल 'प्रचण्डं' कार्यदलं आः तक याःगु सहमति व अन जूगु सहलहया बारे जानकारी बियादीगु खः । प्रचण्डं संविधानसभाय् २२० विवादित विषय मध्ये आः तक ३९गू विषयलय् सहमति जूगु जानकारी बियादीगु खः ।

अथेहे प्रचण्डं मंसिरया न्हापांगु वाः निसें थः पार्टीया ज्याय् व्यस्त जुइगुलिं कार्यदलया संयोजक कांग्रेस संसदीय दलया नेता रामचन्द्र पौडेल वा एमाले नायः झलनाथ खनालयात जुइत नं इनाप यानादीगु खँ सीदुगु दु ।