पौडेलयात प्रम दयेकेत प्रस्ताव वःगु मदु : खनाल
नेकपा (एमाले)या नायः झलनाथ खनालं कांग्रेस संसदीय दलया नेता रामचन्द्र पौडेलयात प्रधानमन्त्री दयेकेत प्रस्ताव मवःगु दावी यानादीगु दु ।
म्हिगः च्वंगु स्वंगू दलया मुँज्याय् बजेट पारित यायेगु निंतिं लच्छिया निंतिं जुसां पौडेलयात प्रधानमन्त्री दयेकेमाःगु धकाः कामचलाउ प्रधानमन्त्री माधवकुमार नेपालं प्रस्ताव तयादीगु बुखँ सार्वजनिक जुयाच्वंगु इलय् एमाले नायः खनालं अज्याःगु प्रस्ताव मवःगु स्पष्ट यानादीगु खः ।
राष्ट्रिय जनसांस्कृतिक महासंघं बिहीवाः खनाल निवास डल्लुइ याःगु देउसी भौलो ज्याझ्लय् वय्कलं पौडेलयात प्रधानमन्त्री दयेकेगु प्रस्ताव वःगु बुखँय् छुं नं सत्यता मदुगु धासें उकीया खण्डन यानादीगु खः ।
तर उगु इलय् वय्कलं प्रधानमन्त्री नेपालं बजेट हयेमफुगु अवस्थाय् थःम्हं थःगु अधिकार राष्ट्रपतियात लःल्हायेगु धकाः बियादीगु अभिव्यक्तिया बारे धाःसा छुं नं धायामदी ।
