पौडेलयात आः तकया हे दकलय् म्हो मत

प्रधानमन्त्रीया निर्वाचनया निंतिं जुयाच्वंगु चुनावी श्रृंखलां थौं १६क्वःगु चरण पार याःगु दु । थौं जूगु प्रधानमन्त्रीया चुनावय् याकः उम्मेदवार कथं दीम्ह कांग्रेस संसदीय दलया नेता रामचन्द्र पौडेलया पक्षय् ८२ मत लाःगु दु । थ्व मतया ल्याः आः तक जूगु चुनावया हे दकलय् म्हो खः । थ्वस्वयां न्ह्यः जूगु चुनावय् पौडेलया पक्षय् ९८मत लाःगु खः ।

कांग्रेसया जक ११४ सभासद्त दुगु व्यवस्थापिका संसदय् थौं मुक्कं १०१ सभासदतय् जक ब्वति दुगु खः । पौडेलया विपक्षय् २ मत व तटस्थय् १७ मत लाःगु खः । माओवादी व एमालें थौंया चुनाव नं बहिष्कार याःगु खः ।

मेगू चरणया चुनावया स्वन्ति लिपा जक याइगु जूगु दु । थौं च्वंगु कार्यव्यवस्था परामर्श समितिया मुँज्यां कात्तिक २९ गते न्हिनसिया ३ बजेया निंतिं १७क्वःगु चरणया चुनाव क्वःछिउगु दु ।