नाकरिकताया विवादय् सहमित
उच्चस्तरीय कार्यदलं मौलिक अधिकार व निर्देशक समिति अन्तगर्तया नागरिकता सम्बन्धी फुक्कं विवादय् सहमति याःगु दु ।
बिहीवाः च्वंगु कार्यदलया मुँज्यां केन्द्र सरकारं एकल नागरिकता जारी यायेगु खँय् सहमति याःगु खः । एकल नागरिकताय् प्रदेशया पहिचान खुले जुइगु कथं केन्द्र पाखें हे नागरिकता बीगु निर्णय जूगु खः ।
अथेहे अंगीकृत नागरिकताया हकय् नेपाःया मिजं नाप विदेशी मिसां इहिपा यानाः विदेशी नागरिकता त्याग याःगु प्रकृया सुरु याःसा नेपाःया नागरिकता बीगु सहमति याःगु दु । उखे नेपाःया मिस नाप विदेशी मिजं नं इहिपा याःसा उम्ह विदेशीं नेपालय् १५ दँ च्वसां जक नागरिकता बीगु व्यवस्था याःगु दु ।
मुँज्यां गैर आवासीय नेपालीतय् निंतिं विशेष नागरिकताया व्यवस्था यायेगुलि नं सहमति याःगु दु । अज्याःगु विशेष नागरिकताय् राजनीतिक अधिकार बाहेकया फुक्कं अधिकार मेपिं नागरिक सरह छ्यले दइगु व्यवस्था याःगु दु ।
