एसएसबीं दायाः नेपाःमि घाःपाः
येँ (सन्ध्या टाइम्स)/भारतीय सीमा सुरक्षा बल एसएबीया जवानतय्सं नेपाःया छम्ह ब्यापारीयात थौं सुथय् दायाः घाःपाः याना बिउगु दु ।
सप्तरीया दुरु ब्यापारी विनोद कुमार यादवयात थौं सुथय् भारतया सीमा सुरक्षा बल एसएसबीं न्ह्यःनेलाःथे दायाः गम्भीर रुपं घाःपाः याना बिउगु खः। घाःपाः जूम्ह यादवयात सगरमाथा अञ्चलया राजविराजय् वासः यायेगु ज्या जुयाच्वंगु दु।
भारतीय बजारं थौं सुथय् दुरु ज्वनाः वयाच्वंगु इलय् यादवयात छिन्नमस्ता गाविसय् दुगु बोर्डर आएटपोष्टया एसएसबीया जवानतय्सं यादवयाके न्यासः ध्यबा बीमाल धाःगु इलय् वय्कलं ध्यबा मबिउगुलिं अथे ल्हाः वाःगु खः धाःगु दु ।
सशस्त्र प्रहरी सीमा सुरक्षा ज्याकू राजविराजया प्रहरी उपरीक्षक भुवनेश्वर प्रसादं उगु घटनायात पुष्टि यानाः घटनायात कयाः अनुसन्धान यानाच्वनागु दु धकाः संचारकर्मीतय्त जानकारी बियादिल ।
