विरामी सीवं पोखराय् अस्पताल घेराउ

येँ (सन्ध्या टाइम्स)/वासः यायां विरामी सीवं थौं सुथंनिसें पोखराया चरक अस्पताल तनावग्रस्त जूगु दु। सीम्ह मनूया छेँजःपिंसं चिकित्सकतय् लापरबाहीया कारणं सीगु धासें दोषीयात कारवाही यायेमाःगु माग यानाः अस्पताल घेरे यानाः नाराबाजी याःगु दु। नाराबाजीं यानाः अस्पताल लागा तनावग्रस्त जूगु दुसा अन व्यापक रुपं प्रहरी परिचालन यानातःगु दु। कास्कीया लाहाचोक गाविस वडा नं. ३० या शिवचन्द्र ढकाल वासः यायेगु झ्वलय् वंगु चान्हय् सीगु खः। भारतया छगू कलेजया प्राध्यापक ढकालयात ज्वरो वःगुलिं वंगु शुक्रवाः अस्पतालय् भर्ना याःगु खः। अस्पतालय् वासः यायेगु ज्या जुयाच्वंगु इलय् थःलाःपिंसं लः त्वंकूगु इलय् ढकाल सीगु खः ।