धाथें 'कू'जुइत्यंगु खः ला ?
यदि माओवादी सरकारं फुर्ति यात धाःसा नेपाली सेनां 'कू' हे यायेगु धकाः तयारी याःगु खः ला ? थ्व न्ह्यसः थन चर्चाया विषय जूगु दु । खतुं सेनां थःपिंसं अज्याःगु छुं नं यायेत्यनागु मखु धाःसां वास्तवय् सैनिक अधिकारीतय् मनःस्थिति धाःसा थुकिं बिस्कं मजूगु खँ सूत्रतय्सं धाःगु दु ।
नेपाली सेना दुने थीथी इलय् जुइगु ब्रिफिङ व कक्षाय् तकं उच्च अधिकृततय्सं 'कू' यानाः जूसां स्थितियात थःपिनि अनुकुल दयेकेमाली धकाः बिचाः बीगु यानाच्वंगु खँ अन दुनेया सूत्रतय्सं धाःगु दु । यदि अज्याःगु 'कू' सम्पन्न याये फत धाःसा नेपाःयात हानं 'हिन्दू राष्ट्र' हे घोषणा यायेगु नं उमिगु मनसाय दुगु खँ सूत्रं धाःगु दु ।
अज्याःगु 'कू'यात एमाले दुनेया छगू लबीं नं समर्थन याइगु व अमेरिका, भारत थेंज्याःगु देशत 'मौन' च्वना बीगु तकया खँ न्ह्यःने वनेधुंकूगु दावी सूत्रं याःगु दु । सम्भवतः सेनाया अज्याःगु खँ सीकाः हे प्यला लिपा वनेत्यंम्ह प्रधानसेनापतियात आः हे चीकेगु ग्वसाः सरकारं याःगु अनुमान नं सूत्रं याःगु दु ।
