एकेदमिया दान्यहिरा सिरपाः लःल्हात

आः विज्ञान व प्रविधिइ नं सिरपाः

नेपालभाषा एकेडेमीया दान्यहिरा सिरपाः कोषं हाकनं मेगु निगू सिरपाः नीस्वंगु दु। म्हिगः एकेदमि व दान्यहिरा सिरपाः कोषया मंकाः ग्वसालय् जूगु दान्यहिरा सिरपाः लःल्हायेगु ज्याझ्वःस सिरपाःदाता यज्ञरत्न धाख्वाजुं उगु जानकारी बियादीगु खः ।

थौंया नीछगूगु शताब्दीया वैज्ञानिक युगय् नं विज्ञान व प्रविधिनापं सीप विकास जुइमफुसा देय्या उन्नति जुइ मफइगु खँ वाःचायेकाः मेगु दँनिसें बीगु कथं वय्कलं ५०,००० दां कोषय् तयादीगु खः। छगू दँयात २५,००० तका विज्ञान ख्यलय् योगदान यानादीपिं व्यक्तियात व मेगु दँय् प्रविधिया ख्यलय् ज्या यानाच्वंम्ह व्यक्तियात सिरपाः बीगु व्यवस्था यानादीगु खः। नापं भाषा साहित्यया ख्यलय् विशेष योगदान याना वयाच्वंपिनिगु स्वास्थ्य उपचारया निंतिं २५,००० तका दां तक ग्वाहालि बीगु नं जूगु दु। थुगु निगुलिं सिरपाः नेपालभाषा एकेडेमिया तत्वावधानय् बीगु जुइ ।

न्हय्क्वःगु दान्यहिरा सिरपाः थुगुसी समालोचक व बाखं च्वमि माधवलाल कर्माचार्ययात लःल्हाःगु खः। ६१ दँ न्ह्यवंनिसें साहित्य ख्यलय् विशेष योगदान यानादीगुलिं उकिया हे कदर यासें वय्कःयात थ्व सिरपाः लःल्हाःगु खः। थुगु सिरपाःया दां ५०,००० तका खः। सिरपाः लःल्हानाकासें वय्कलं थुगु सिरपालं थःत थःगु मूल्यांकन यायेत चेतना दयावःगु खँ कनादिल ।

अथे हे थुगुसीया "दान्यहिरा हःपाः सिरपाः" लोकं ह्वाःगु मचा लय्पौ "ईलोहं" यात बिल। मचा साहित्य ब्वलंकेगु आज्जु ज्वनाः झिदँ न्ह्यवंनिसें पिदंगु 'ईलोहं' यात हःपाः सिरपाः लःल्हाःगु खः। थुगु सिरपाः नेपालभाषा व साहित्य ख्यलय् खनेदयेकः वयाच्वंपिं न्हूपिं बिस्कंकथंया प्रतिभाशाली, साहित्यकार, पत्रकार व भाषासेवीपिंत बीगु खः। थुगु सिरपाः २५,००० तकाया खः ।

सिरपाः नेपालभाषा एकेडेमीया भाइसचान्सलर व सभानायः लक्ष्मण राजवंशीं लःल्हानादीगु खः। सिरपाः लःल्हानादिसें भाजु राजवंशीं नेपालभाषाया ख्यलय् साहित्यकारत म्हो जुया वनाच्वंगु खँ कँसें मचांनिसें जग दयेके मफुसा साहित्य ख्यः तःधनी मखु धयादिल ।

'ईलोहं'या सम्पादक नरेशवीर शाक्यं मस्तय्सं मां भासं खँ मल्हायेगु व मचातय्गु निंतिं बिस्कं पत्रिका मदुगु कारणं मांभाषाप्रति मस्तय्त आकर्षण यायेगु आज्जुं हे 'ईलोहं' प्रकाशन यानागु खँ कनादिल। साल तमाम मजुइकं म्हपुजा यायेगु नेवाः परम्पराया विरोध जूवनीगु जुयाः २० गते हे लक्ष्मीपुजा, २१ गते म्हपुजा व नेपाल संवत् ११३१ या न्हूदँ अले २२ गते हे किजापुजा यायेत नं वय्कलं इनाप यानादिल ।

जल तरंग व मंगल धुनं न्ह्याकूगु उगु ज्याझ्वलय् सिरपाः त्याकादीपिं निम्हेसितं लुखांनिसें लसकुस यासें दबुली तक हःगु खः। अथे हे बज्र कला कुञ्जपाखें न्याम्ह कुमारीया चचाप्याखं नं क्यंगु खः ।

ज्याझ्वलय् कला न्ह्यब्वःपिं कलाकारपिंत नं दसिपौ लःल्हाःगु खः। ज्याझ्वलय् नेपालभाषा एकेडेमीया सदस्यसचिव इन्द्र मालीं लसकुस यानादीगु खः ।