देय्या निंतिं मिसा प्रधानमन्त्री माः
न्हूगु नेपाः दयेकेया निंतिं मिसा प्रधानमन्त्री माःगु खँ प्रा. लक्ष्मीकेशरी मानन्धरं कनादीगु दु। वंगु शनिवाः व आइतवाः निन्हुयंकं काठमाडौं विजनेश एण्ड प्रोफेशनल विमेन व विमेन एसोसिएसन फर ट्रेनिङया मंकाः ग्वसालय् जूगु हस्तकला प्रदर्शनी, बिक्री व खाद्य मेलाया सभापतित्व यासें वय्कलं संसदय् झिंप्यक्वः तक चुनाव जुलं नं प्रधानमन्त्री ल्यये मफुगु वर्तमान अस्थिर राजनैतिक अवस्था व अन्यौलताया कारणं जनताय् नकारात्मक लिच्वः लानाच्वंगुलिं न्हूगु नेपाःया आशा गुकथं याये फइ धकाः न्ह्यसः नं तयादिल ।
मेलाया निगुलिं ग्वसाः खलःया मू उद्देश्य व लक्ष्य छगू हे जूगुलिं निगुलिं संस्था मिले जुयाः न्हापांखुसी थुकथंया मंकाः ज्याझ्वः यानागु खँ नं वय्कलं कनादिल। वय्कलं वर्तमान अस्थिर राजनीतिं मिसात हे अप्वः मारय् लानाच्वंगु दावी नं यानादिल ।
ज्याझ्वःया उलेज्या यानादिसें मू पाहां सूचना तथा सञ्चारमन्त्री शंकर पोखरेलं नेपाःमितय्सं विदेशी ख्वाः मस्वसे थुकथं हे उद्यमशील ज्या यानाः जनतायात जागृत, समृद्ध व विकासया निंतिं पलाः न्ह्याकल धाःसा राजनैतिक अस्थिरतां निराश जुया च्वनेमाःगु आवश्यक मदु धयादिल। वय्कलं व्यक्ति, समाज व समाजं देय्यात हीकाः न्हूगु नेपाः दयेकेगु खँय् शंका मदु धासें भारतया विहार राज्यया दसु न्ह्यथनादिल। न्हापा छेँय् जक लिकुनाच्वनीपिं मिसात थौं थुकथंया प्रदर्शनी यानाः देय्या निंतिं प्रगतिशील लँपुइ न्ह्यज्याःगु खँय् लसता प्वंकुसें थुगुसीया बजेटय् मिसापिनि निंतिं बिस्कं हे व्यवस्था दुगु जानकारी नं बियादिल ।
ग्रामिण मिसातय्त साक्षर दयेकेगु, इमित सीपमूलक ज्याय् लगे यायेगु व लिपा वित्तीय संस्थाय् आवद्ध यानाः मिसा सशक्तीकरण यायेगु मू आज्जु ज्वनाः न्हापांखुसी निगुलिं मंकाः संस्थाया ग्वसालय् हस्तकला प्रदर्शनी तथा बिक्री व खाद्य मेला जूगु खः ।
त्रिपुरेश्वरस्थित बैठक भेन्यूया हलय् जूगु प्रदर्शनीइ नसा ज्वलं, हस्तकला, वहया तिसाज्वलं, कःनिपां छायेपीगु, प्याच पेन्टिङ्ग, कापः लगायत ख्वीगू स्टल तयातःगु खः। निन्हुयंकंया प्रदर्शनीइ मुक्कं ख्वीद्वः मनूतय्सं प्रदर्शनी स्वःगु अनुमान ग्वसाः खलकं याःगु दु ।
प्रदर्शनीइ दुहां वनेत टिकटया २५ तका कयाच्वंगु उगु मेला न्ह्याये न्ह्यः हे स्वीद्वः टिकट मीधुंगु नं ग्वसाः खलकं जानकारी बिउगु खः। लिसें दुहां वनेगु टिकटय् न्हाप येँ-बैंकक-येँया निपाः टिकट, लिउ येँ-भैरहवा-येँया निपाः टिकट व लियांलिउ फ्रीज व प्यंगूगु येँ-पोखरा-येँया निपाः टिकट लुखासिरपाः तःगु खः ।
ज्याझ्वःया संयोजक अन्जना ताम्राकारं लसकुस यानादीगु खःसा बाट्सया नकिं सीता मानन्धरं सुभाय् देछानादीगु खः। प्रदर्शनीया मुख्य आकर्षणया रुपय् पोत्या काः, वहया तिसा ज्वलंत, नेपाली भ्वंया सामानत व थीथी डिजाइनया 'प्याच वर्क'या तन्ना, टि-शर्ट आदि दुथ्याःगु खः ।
वाटसं सन् १९५३ निसें निरन्तर रुपं थीथी कथंया तालिम बियाः सृजनशील मिसा उत्पादन यानाच्वंगु दुसा केविपिडब्ल्यूं किपू, बलम्बु, सेतीदेवी गाविसय् मिसा साक्षरता अभियान न्ह्याकेधुंकाः थौंकन्हय् इचंगु गाविसय् न्यालाया तालिम संचालन यानाच्वंगु दु ।
