थापा-डेलिसी खँल्हाबंला

छुं ई न्ह्यः निसें राजनीतिक नापलाय् ज्याय् व्यस्त जुयादीम्ह अमेरिकी राजदूत स्कट एच. डेलिसीं थौं पुलाम्ह प्रधानमन्त्री सूर्यबहादुर थापायात नापलानादीगु दु ।

थापा निवास मालीगामय् वनाः राजदूत डेलिसीं शान्ति प्रकृया, संविधान निर्माण व सरकार गठनया बारे च्यूता प्वंकादीगु खः । वय्कलं नेपाःया शान्ति व संविधान प्रकृया लिबानाच्वंगुलिं विश्व समुदाययात बांमलागु सन्देश वनाच्वंगु धयादिल ।

उगु इलय् थापां दलत दथुइ सहमति मजुइकं शान्ति व संविधान निर्माण जुइमफूगु धासें याकन हे दलत दथुइ सहमति जुइगु विश्वास प्वंकादीगु खः ।

थ्वस्वां न्ह्यः राजदूत डेलिसीं म्हिग सभामुख सुभाषचन्द्र नेम्वाङ व एमाले नायः झलनाथ खनालयात नापलानादीगु खःसा वस्वयां छुं दिं न्ह्यः माओवादी नायः प्रचण्ड व कांग्रेस सभापति सुशील कोइरालायात नं नापलानादीगु खः ।