कर कडा जूगुलिं बजाःभाः थहां वन
तराई लागाय् थारु समुदायं यानाच्वंगु आन्दोलनं यानाः स्वनिगःया बजाः नं प्रभावित जूगु दु । छखे थन मचिकं पेट्रोलया अभाव शुरु जुया वःगु दुसा मेखे बजाः भाः नं तसकं थहां वंगु दु । तराई बन्दया लिच्वः कथं मांया ख्वाः स्वये छन्हु न्ह्यः बजारय् स्याउ किलों २६० तका तक थ्यन । चिनी किलों ६० तका थ्यनसा थीथी कथंया केँया भाः नं उतिकं हे थहां वंगु दु । लिसें चिकं जाकिया भाः नं थहां वनाच्वंगु दु ।
उखे बजाः भाः थहां वंगुया दोष तराई बन्दयात बिउसां विशिष्ट सूत्रतय्सं कथं धाःसा बजाःभाः थुभनं थहां वंगुया कारण सरकारं कर म्हयेगु ज्याय् याना हःगु कडाई खः । सरकारं अप्वः कर म्हयेगु लागिं थौंकन्हय् व्यापारीतय्त ज्वनाः उमिसं छले याइगु कर पुइकेगु ज्या यानाच्वंगु दु । तर व्यापारीतय्सं धाःसा सरकारयात पुलेमाःगु करया दां बजाःभाः थकयाः सायेकाच्वंगु दु । सरकारं केवल कर जक म्हयाः बजाः अनुगमन मयाःगुलिं भाः थहां वनाच्वंगु खँ धाःगु दु ।
