नागरिकता बारे कन्हय् निर्णय याइगु

न्हूगु संविधानय् नागरिकताया बारे अन्तिम निर्णय कन्हय् च्वनीगु उच्चस्तरीय कार्यदलया मुँज्यां याइगु जूगु दु । थौं च्वंगु कार्यदलया मुँज्याय् नागरिकता सम्बन्धी प्रावधानय् दलत सहमति नापसं थ्यंगु दु ।

राष्ट्रिय संरक्षण समितिया प्रतिवेदनय् जूगु सहलहलय् प्रादेशिक पहिचान सहितया एकल नागरिकता केन्द्र पाखें बीगु प्रति अधिंकाशं दलतय्सं सहमति प्वंकूगु दु । नेपाल मजदुर किसान पार्टीं धाःसा नागरिकता केन्द्र व प्रदेश निगूलिं थासं बीमाःगु माग याःगु दु ।

माओवादी नायः पुष्पकमल दाहाल 'प्रचण्ड'या संयोजकत्वय् निस्वंगु उच्चस्तरीय कार्यदलयात संविधानसभा दुने खनेदुगु विवादित विषययात ज्यंकेगु जिम्मेवारी बियातःगु खः ।