स्पष्टीकरण ठीक, विषय बेठीक
प्रधानसेनापति प्रकरणयात कयाः ब्वलंगु विवाद बारे एमालें 'मध्यमार्गी' लँपु ज्वनीगु संकेत खने दया वःगु दु । अज्याःगु मध्यमार्गी लँपु मालेत धकाः एमालें म्हिगः च्वंगु स्थायी समिति बैठक नं स्थगित याःगु दु ।
एमाले महासचिव ईश्वर पोखरेलं कनादी कथं एमालें प्रधानसेनापतियात स्पष्टीकरण हे न्यने मजिउ धइगु खँयात धाःसा अस्वीकार याःगु दु । प्रधानसेनापतियात स्पष्टीकरण न्यंगु ठीक खःसां उकिया विषयवस्तु प्रति धाःसा एमालें विमती क्यनीगु सम्भावना ब्वलंगु दु । भाजु पोखरेलया कथं सरकारं स्पष्टीकरणय् न्यनातःगु स्वंगुलिं न्ह्यसः एमालेयात चित्त बुझे मजू । न्हूगु सेना भर्ना काःगु ठीक खः धकाः एमालें अबलय् हे वक्तव्य बिउगु खः । च्याम्ह जर्नेलतय् म्याद थप मयायेगु अधिकार सरकारयाके दुसां थप मयायेमाःगुया कारण नं स्पष्ट यायेमाः धइगु एमालेया बिचाः दु । अथे हे राष्ट्रिय खेलकुदय् नं प्रधानमन्त्री खेलकुद परिषद्या संरक्षक जूगुया लबः कयाः जबर्जस्ती माओवादी कासामियात ब्वति कायेकूगु धइगु एमालेया ठहर दु । उकिं एमालें 'स्पष्टीकरण ठीक, तर उकिया विषयवस्तु धाःसा बेठीक' धइगु लाइन बीगु सम्भावना दु । थथे जुल धाःसा प्रधानसेनापति बचे जू वनी । एमालें थिनंनिसें हे थ्व बारे मेमेगु पार्टीलिसे नं सहलह यायेत्यंगु दु । केन्द्रीय बैठक धाःसा २५ गते च्वनेत्यंगु दु ।
