कार्तिक २२ गते सार्वजनिक बिदा बीगु जुल

येँ (सन्ध्या टाइम्स)/प्रधानमन्त्री माधव कुमार नेपालं कार्तिक २२ गते किजापुजा कुन्हु सार्वजनिक विदा बीगु बचं बियादीगु दु ।

थौं नेवाः देय् दबूया संयोजनय् नेवाः सभासद्, थीथी खलः पुचःया प्रतिनिधि नापं थाय्थासय् च्वंगु न्हूदँ समारोह समितिया प्रतिनिधित सिंहदरवारय् च्वंगु प्रधानमन्त्री ज्याकुथी डेलिगेशन वंगु इलय् प्रम नेपालं नेवाः संस्कृति व नेवाः भावनायात कदर यासें २२ गते नं सार्वजनिक विदा बीगु बचं बियादीगु खँ देय् दबूया नायः नरेश ताम्राकारं 'सन्ध्या टाइम्स'यात कनादिल ।

उगु पुचलं प्रमयात नेपाल संवत्यात राष्ट्रिय संवत् घोषणा यायेधुंकूगु अवस्थाय् राज्यं हे न्हूदँ समारोह समिति दयेकाः न्हूदँ हनेमाःगु, म्हपुजा कुन्हु गोवर्धन पुजा धकाः जक मखुसें नेपाल संवत्या न्हूदँ धकाः हे विदा बीमाःगु, नेवाःतय्गु नखःचखः बारे नेवाःतय्सं हे निर्णय याये दयेमाःगु नापं थीथी कथंया माग दुथ्याःगु छगू ज्ञापनपत्र नं लःल्हाःगु खः। सहलहया झ्वलय् प्रधानमन्त्री नेपालं २२ गते सार्वजनिक विदा बीगु नापं मेमेगु मागया बारे याकनं हे सहलह ब्याकाः न्ह्याः वनेगु बचं नं बियादीगु खँ नायः ताम्रकारं कनादीगु दु ।

उगु डेलिगेशनय् नेवाः सभासद्पिं डा. मंगलसिद्धि मानन्धर, बुद्ध साय्मि, दिलीप महर्जन, सत्यलाल मुल नापं प्राध्यापक माणिकलाल श्रेष्ठ, मल्ल के. सुन्दर, राजेन्द्र श्रेष्ठ, नरेश ताम्रकार, येँया पश्चिम लागा नेवाः पुचः, ख्वपया न्हूदँ हना खलःया प्रतिनिधि, थाय्थासय् च्वंगु न्हूदँ हना खलःया प्रतिनिधि नापं थीथी खलः पुचःया यानाः न्यय्म्हं मल्याक मनूतसं ल्हाःचिं तयाः प्रधानमन्त्रीयात ज्ञापन पौ लःल्हाःगु खः ।

थ्वहे दथुइ नेवाः देय् दबूपाखें कन्हय् स्वनिगलय् थाय् थासय् दयेकातःगु न्हूदँ हना खलः पुचःया प्रतिनिधितय्गु मंकाः भेला याइगु जूगु दु। देय् दबूया ज्याकुथी कन्हय् नेपाल संवत् ११३१ न्हूदँ हनेगुली एकरुपता हयेगु नापं छगू लागानाप मेगु लागा पुचःपाखें समन्वय यानाः न्ह्याः वनेगु, नारा थ्वयेकेगुली नं फयां फछि एकरुपता हयेगु नितिं न्हूदँ समारोह समिति, न्हूदँ हना खलः पुचःया प्रतिनिधितय्गु मंकाः भेला यायेत्यंगु खः धाःगु दु। कन्हय्या भेलाय् न्हूदँ छन्हु बाहेक मेमेगु दिनय् नं गुगु कथं निरन्तर ज्याझ्वःत याना वनेफइ धइगु खँय् नं सहलह जुइगु खँ देय् दबुलिं धाःगु दु ।