पौडेलया उम्मेदवारी खारेजीया तयारी: गौतम
येँ (सन्ध्या टाइम्स)/नेकपा (एमाले) या उपाध्यक्ष बामदेब गौतमं संसदया नियमावली भिंकाः आः न्ह्यानाच्वंगु प्रधानमन्त्रीया निर्वाचनं नेपाली कांग्रेस संसदीय दलया नेता रामचन्द्र पौडेलया उम्मेदवारी हे खारेज यायेगु तयारी जुयाच्वंगु खँ कनादीगु दु ।
प्रेस चौतारी दाङं थौं सुथय् याःगु पत्रकार भेटघाट ज्याझ्वलय् नेता गौतमं थ्व तयारी बारे कनादीगु खः। वय्कलं न्ह्याक्व हे चुनावय् बूसां नं मदिक्क चुनाव यायेमाःगु बाध्यकारी व्यवस्थायात भिंकाः पौडेलया उम्मेदवारी खारेज याकेगु निंतिं दलतय्गु दथुइ कुतः जुयाच्वंगु जानकारी नं बियादिल ।
याकःचा उम्मेदवार जुयाच्वंम्ह पौडेलं उम्मेदवारी खारेज याये धुंकाः स्वंगू दल च्वनाः शान्ति, संविधान व सरकार निर्माणया ज्याय् न्ह्याः वनीगु दावी नं वय्कलं यानादिल।
देशय् जुयाच्वंगु विदेशी हस्तक्षेप पनेगु निंतिं नं दलत छप्पँ मजुसे हे मगाःगु अवस्था वःगु दु धासें नेता गौतमं कांग्रेसं उम्मेदवारी लित कयाः सहमतिया वातावरण ब्वलंकल धाःसा बांलाइगु बिचाः नं प्वंकादिल ।
