शान्ति, संविधान व लोकतन्त्रया निंतिं नागरिक पदयात्रा
राजनीतिक गतिरोधया कारणं सरकार गठन व बजेट तकं हयेमफयाच्वंगु इलय् इमित दबाव बीत नागरिक समाजं थौं छगू पदयात्रा यात ।
शान्ति, संविधान व लोकतन्त्र धकाः मू नारा बीयाः येँया बसन्तपुली न्ह्याःगु पदयात्रा न्हू सतक, त्रिपुरेश्वर, थापाथली, माइतीघर, बबरमहल जुयां न्हू बानेश्वरस्थित संविधानसभा भवन न्ह्यने वयाः क्वचाःगु खः ।
पदयात्रा लिपा न्हू बानेश्वरय् जूगु कोण सभाय् नागरिक समाजया अगुवातय्सं शान्ति व संविधानयात दलतय्सं बेवास्ता याःगुलिं हानं छक्व इमित फुक्क क्षेत्रं दबाव बीमाःगु खँय् बः ब्यूगु खः । सभायात नागरिक समाजया दमननाथ ढुंगाना, श्याम श्रेष्ठ, चरण प्रसाईं लगायतं सम्बोधन यानादीगु खः ।
पदयात्राय् नेवाः देय् दबु नापं थीथी १६गू संघसंस्था, नागरिक समाजया अगुवात, मानव अधिकारवादी नेतात, आदिवासी जनजाति नापं थीथी पेशगत संघसंस्थाया प्रतिनिधितय् ब्वति दुगु खः ।
