न्हूगु संविधानय् बहुभाषिक नीति दुथ्याइगु
उच्चस्तरीय कार्यदलं न्हूगु संविधानय् बहुभाषिक नीति दुथ्याकेगु निर्णय याःगु दु । थौं च्वंगु कार्यदलया मुँज्यां भाषा विवादया बारे सहमति यासें बहुभाषिक नीति नालेगु निर्णय याःगु खः ।
सिंहदरवारस्थित राज्य व्यवस्था समितिया भवनय् जूगु मुँज्यां केन्द्रीय सरकारया सरकारी ज्याखँया भाय् देवनागरी लिपिया खस नेपाली भाय् जुइगु निर्णय याःगु खः । आःयात खस नेपाली भाय् ज्याखँया भाय् जुसां लिपा भाषा आयोग गठन यानाः अनं वःगु सुझावया आधारय् मेमेगू भाय्यात नं मान्यता बीगु सहमति याःगु खः ।
'आःयात सरकारी ज्याखँया भाय् देवानागरी लिपि च्वयातःगु नेपाली जुइ' एमाले नेता भरतमोहन अधिकारीं धयादिल, 'लिपा भाषा आयोग गठन जुइधुंकाः उकीं सूचीकृत याइगु भाय्यात नं सरकारी भाय्या मान्यता बीगु जुइ ।'
अथेहे प्रान्तया सरकारी भाय् छु जुइगु अन छगू जक सरकारी ज्याखँया भाय् जुइगु व अप्व जुइगु धइगु बारे प्रान्तीय संसंदयात हे निर्णय यायेगु अधिकार बीगु नं सहमति याःगु दु ।
