अमेरिकी राजदूत डेलिसी सक्रिया
नेपाःया निंतिं अमेरिकी राजदूत स्कट एच. डेलिसी थीथी राजनीतिक दलया नेतात नापलायेगु ज्याय् सक्रिया जुयादीगु दु । छुं दिं न्ह्यः जक एनेकपा (माओवादी)या नायः पुष्पकमल दाहाल 'प्रचण्ड' व नेपाली कांग्रेसया सभापति सुशील कोइरालायात नापलानादीम्ह डेलिसीं थौं सभामुख सुभाषचन्द्र नेम्वाङ व नेकपा (एमाले)या नायः झलनाथ खनालयात नापलानादीगु खः ।
सभामुख नेम्वाङ व एमाले नायः खनाल नापया खँल्हाबंलाय् वय्कलं काम चलाउ सरकारया आयु ताःहाक जूगु हुनिं अमेरिकां ग्वाहालि यायेत थाकूगु गुनासो प्वंकादीगु दु । वय्कलं अमेरिकां नेपाःयात यानाच्वंगु ग्वाहालियात निरन्तरता बीगु जूसां काम चलाउ सरकार जूगु कारणं थाकूगु धयादिल ।
सिंहदरवारस्थित सभामुखया ज्याकूथी नेम्वाङ नापया खँल्हाबंलाय् डेलिसीं शान्ति प्रकृया, संविधान निर्माण व लडाकु समायोजनया बारे च्यूताः प्वंकादीगु खः । वय्कलं अनमिनया ई क्वचायेत्यंगुलिं लडाकु समायोजनया प्रगति बारे विशेष च्यूताः प्वंकादीगु खः ।
उखे एमाले संसदीय दलया ज्याकूथी एमाले नायः खनालनाप जूगु खँल्हबंलाय् नं वय्कलं शान्ति व संविधानया बारे च्यूताः प्वंकादीगु खः । नापं वय्कलं राजनीतिक दलत दथुइ ब्वलनाच्वंगु कचवं क्वचायेकेत जुयाच्वंगु कुतःया बारे नं एमाले नायः खनाल नाप सहलह यानादीगु खः ।
