संवैधानिक परिषद्या बैठकय् सहलह मजुसें क्वचाल

संवैधानिक अंगया प्रमुखत नियुक्तिया निंतिं सोमवाः च्वंगु संवैधानिक परिषदया बैठकय् छुं नं एजेण्डाय् सहलह जुइमफुत ।

थीथी संवैधानिक अगंया प्रमुखत खाली जुयाच्वंगु हुनपिं राजनीतिक नियुक्ति यायेत सोमवाः प्रधानमन्त्री माधवकुमार नेपालं सःतुगु बैठकय् प्रमुख विपक्षी दलया नेता पुष्पकमल दाहाल अनुपस्थित जुयादीगु खः । प्रमुख विपक्षी दलया नेता हे अनुपस्थित जूगु इलय् छुं नं निर्णय यायेगु पाय्छि मजूगु धकाः सभामुख सुभाषचन्द्र नेम्वाङं सुझाव बीवं बैठक एजेण्डाय् हे दुहांमवंक क्वचाःगु खः ।

संवैधानिक अगंत अख्तियार दुरुपयोग अनुसन्धान आयोग, महालेखा परीक्षक व निर्वाचन आयोगय् प्रमुखत छुं दँ निसें नियुक्त जुइमफुनीसाः माओवादीं वर्तमान काम चलाउ सरकारं थंज्याःगु महत्वपूर्ण राजनीतिक निर्णय यायेमज्यूगु अडान कयाच्वंगु दु ।