आर्थिक खँय् प्रदेशं केन्द्रयाके अनुमति कायेमाः

येँ (सन्ध्या टाइम्स)/न्हूगु संविधान निर्माणया झ्वलय् ब्वलनाच्वंगु विवाद ज्यंकेगु नितिं धकाः दयेकूगु उच्च स्तरीय राजनीतिक कार्यदलया मुँज्यां प्रदेशं आर्थिक, औद्योगिक खँ क्वःछीत तकं केन्द्रयाके अनुमति कायेमाःगु खँ संविधानय् तयेगु धकाः सहमति जूगु दु। थौं सिंहदरवारय् च्वंगु मुँज्यां प्रदेशया सूचिकृत अधिकार अन्तर्गत अथे औद्योगिक नापं आर्थिक सवालय् केन्द्रयाके अनुमति कायेमाः धकाः खँ क्वःछिउगु खः ।

अथे हे प्रदेशं छुं नं सन्धि सम्झौता यायेमाल धाःसां केन्द्रयाके अनुमति कायेमाः धकाः खँ क्वःछिउगु खः। उच्चस्तरीय राजनीतिक कार्यदलं संविधानसभाया राष्ट्रिय हित संरक्षण समितिया प्रतिवेदनय् विवाद ब्वलनाच्वंगु थीथी खँ मध्ये थौं सहमति याःगु प्यंगू बुँदा मध्ये प्रधानसेनापतिया नियुक्ति प्रधानमन्त्रीया सिफारिसय् राष्ट्र प्रमुखं यायेगु, प्रधानसेनापतिया बर्खास्ती मन्त्रिपरिषदया सिफारिसय् राष्ट्रप्रमुखं यायेगु खँय् सहमति जूगु दु ।

थौंया मुँज्याय् कार्यदलया कजि एकीकृत माओवादी प्रचण्ड, दुजःपिं कांग्रेसया संसदीय दलया नेता रामचन्द्र पौडेल, एमालेया अध्यक्ष झलनाथ खनाल, नेमकिपाया अध्यक्ष नारायणमान बिजुक्छे नापं मेमेपिंसं ब्वति कयादीगु खः। मुँज्याय् कार्यदलया नितिं दयेकूगु ग्वाहालि पुचःया दुजःपिं देव गुरुङ, भरतमोहन अधिकारी, रमेश लेखक, सुनिल प्रजापतिपिंसं नं ब्वति कयादीगु खः। मुँज्यायात निरन्तरता बिया वनेगु नापं फुगु तक सहमति यायेगु धकाः नं नेतातय्सं कुतः यानाच्वंगु खँ धाःगु दु। सहमति ब्वलंके मफुगु १८ दँ दुपिंत सैन्य तालिम बीगु लाकि मबीगु, संविधानय् जनयुद्ध खँग्वः तयेगु ला कि मतयेगु नापं मेमेगु खँयात सैवंधानिक समितिइ छ्वयेगु धकाः थौंया मुँज्याय् खँ जूगु खः ।