नेपालय् बुन्हि न्यायेकेगु रहर
जर्मन नागरिक भाजु योहान विलासेकं नेपाः वयाः थःगु बुन्हि न्यायेकः वयाच्वंगु झिंन्यादँ दत। वय्कः थुगुसी नं नेपाः थ्यन। थुगुसी वय्कः थःगु ८५ दँ क्यंगु बुन्हि न्यायेकेत नेपाः झाःगु खः। ८५ दँ दुम्ह वृद्ध भाजु योहान जर्मनींनिसें याकःचा हे नेपाः थ्यंकः वःगु खः ।
बुन्हि न्यायेकेत वय्कः खाली ल्हाः वइ मखु। दँय्दसं वय्कः निगू ह्विल चियर ज्वनाः नेपाः झाइ। अले थनया शारीरिक रुपं अपांगपिं मनूतय्त उगु ह्विल चियर उपहार बियादी। आः तक वय्कलं नेपाःया थीथी व्यक्ति व संस्थातय् लागिं ५० गू ह्विल चियर उपहार बियादीधुंकल ।
थुगुसी वय्कलं येँया ३० वडाय् च्वंम्ह भाजु अजय स्थापित (३६ दँ) व गोर्खा जिल्लाया बोर्लाङ गाविसय् च्वंम्ह भरत सापकोटायात थ्व ह्विल चियर लःल्हानादीगु खः। सापकोटाया ह्विल चियर येँय् दुम्ह वय्कःया किजां (किपाय् खनेदुम्ह) लःल्हानाः कयादीगु खः ।
अले भाजु योहानयात येँय् वयाः थज्याःगु ज्याझ्वः यायेत ग्वसाः दयेका बीगु ज्याय् चाहिं येँया सिने दबू प्रा.लि.पाखें माःगु ग्वाहालि याना बीगु जुयाच्वन ।
८५ दँ दुम्ह भाजु योहान निक्वःगु विश्वयुद्ध ताकाय् जर्मनीया पक्षय् युद्ध ल्वाःम्ह छम्ह योद्धा खः। वय्कः तत्कालिन जल सेनाया छम्ह सैनिक अधिकारी जुयाच्वन। थौंकन्हय् वय्कः वहे सेनाया जागिरं वःगु पेन्सनं गुजारा यानाच्वनादीगु दु ।
