प्रम पाखें शीर्ष नेतातय् बैठक आव्हान
प्रधानमन्त्री माधवकुमार नेपालं मंगलवाः शीर्ष नेतातय् बैठकया आव्हान यानादीगु दु । प्यलाः जुइधुंकाः नं बजेट हयेमफयाच्वंगु इलय् सरकार प्रमुखया हैसियतं थुकीया बारे सहलह यायेत प्रधानमन्त्री नेपालं मंगलवाः बैठक आव्हान यानादीगु खः ।
कन्हय् जुइगु बैठकय् वर्तमान राजनीतिक गतिरोध व सरकार गठनया बारे नं सहलह जुइगु खँ धाःगु दु । अथेहे शान्ति व संविधान, माओवादी लडाकु समायोजन, संवैधानिक अंगया प्रमुखतय् नियुक्ति लगायतया विषयलय् नं सहलह याइगु ज्याझ्वः दु ।
थ्वहे दथुइ थौं प्रधानमन्त्री माधवकुमार नेपालं सेना समायोजन नापं संवैधानिक अंगया प्रमुखत नियुक्त यायेगु बारे प्रमुख विपक्षी दल एनेकपा (माओवादी)या नायः पुष्पकमल दाहाल 'प्रचण्ड'नाप सहलह यानादीगु दु ।
संवैधानिक समितिया बैठकय् प्रचण्डयात तःक्व हे सःतुगु खःसां उपस्थित मजुइवं प्रधानमन्त्री नेपालं वय्कयात नापलानाः थुकी ग्वाहालि यायेत इनाप यानादीगु खः । उगु इलय् प्रचण्डं दक्व विषयलय् प्याकेजय् सहमति यानाः न्ह्याः वनेमाःगु लिसः बियादीगु खः ।
