'दलतय्सं शान्ति प्रक्रियाया मर्म मथुल'
येँ (सन्ध्या टाइम्स)/ एकीकृत नेकपा (माओवादी)या उपाध्यक्ष डा. बाबुराम भट्टराईं आःया अवस्थाय् दलतय्सं शान्ति प्रक्रियाया मर्म हे मथुल धयादीगु दु ।
वय्कलं दलतय्सं शान्ति प्रक्रियाया मर्म मथुयाः हे राजनीतिक गतिरोध अन्त्य याये मफयाच्वंगु खः धकाः नं धयादिल। विराटनगरय् थौं सुथय् क्रान्तिकारी पत्रकार संघ मोरङं ग्वसाः ग्वःगु पत्रकार भेटघाट ज्याझ्वलय् न्ववायेगु झ्वलय् वय्कलं थ्व खँ धयादीगु खः ।
आःया अवस्थाय् न्हूगु सरकारया नितिं दलतय्गु दथुइ मेगु छगू सम्झौताया आवश्यकता दु धासें वय्कलं शान्ति प्रक्रिया व न्हूगु संविधान निर्माणया निंतिं दलतय्सं चाहे जूसा याकनं हे प्याकेजय् सहमति यायेफइ धकाः नं धयादिल। थम्हं विराटनगर भ्रमण यानाच्वनागुयात थीथी संरचार माध्यमं भ्रामक रुपं समाचार सम्प्रेषण यानाच्वंगुलिं थःत दुःख ताल धकाः नं वय्कलं असन्तुष्टी नं प्वंकादिल ।
